سوال: کیا میں تراویح بیٹھ کر پڑھ سکتی ہوں ،ویسے تو ڈاکٹر نے کرسی پر بیٹھ کر نماز پڑھنے کا کہا،میں فرض نماز پھر بھی بغیر کرسی کے ہی پڑھتی ہوں ،تروایح طویل ہوجاتی ہیں ،اس میں پھر تکلیف زیادہ ہوتی ہے۔
جواب: پوچھی گئی صورت میں تراویح اگر کھڑے ہوکر پڑھنے میں تکلیف ہےیامرض کے بڑھ جانے یادیرسے ٹھیک ہونے کاصحیح اندیشہ ہے تو بیٹھ کر پڑھنے میں حرج نہیں اور اگر کھڑے ہوکر پڑھنے میں کوئی عذرنہیں تو اس صورت میں بیٹھ کر نماز تراویح پڑھنے سے نماز توادا ہوجائے گی ، لیکن یہ مکروہ تنزیہی(یعنی ناپسندیدہ عمل ) ہے اوربلاعذر بیٹھ کرپڑھنے والے کو کھڑے ہو کر پڑھنے والے کی بنسبت آدھا ثواب ملے گا۔جبکہ بعض علماء کے نزدیک توبیٹھ کرتراویح کی نماز اداکرنے سے اداہی نہیں ہوگی ۔لہذااس معاملے میں زیادہ احتیاط کی ضرورت ہے کہ کوئی عذرنہ ہوتوکھڑے ہوکرہی تراویح کی نمازاداکی جائے ۔
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم
